(Salaamanews)-Ciidamada dowladda Soomaaliya iyo kuwa AMISOM oo howlgal ballaaran ka waday Arbacada maanta ah magaalada Marko ee gobolka Shabeellaha hoose, ayaa waxaa lala eegtay qarax loo adeegsaday miinada dhulka lagu aaso ee laga hago remote-ka.
Goob joogayaal ayaa sheegay in qaraxa oo ahaa mid cuslaa uu khasaare dhaliyay markii uu dhacay kadibna waxaa la sheegay in rasaas ay oodda ka qaadeen ciidamada AMISOM oo laba ruux oo rayid ah ku dhaawacay magaalada Marko.
Dhaawacyada ayaa loo qaaday cisbitaalka, waxaana markaasi kadib billowday baaritaanno kuwii hore ka cuslaa oo ay sameeyeen ciidamada dowladda, mana jiro war rasmi ah oo sheegaya in la qabtay dadkii weerarka ka dambeeyay.
Gudoomiye xigeenka amaanka magaalada Marko C/salaam Macallin Cabdulle, ayaa SN u sheegay in weerarku uu ka dhacay bartamaha magaalada isla markaasina lala eegtay ciidamada AMISOM iyo kuwa dowladda oo howlgallo ka waday bartamaha magaalada Marko.
“Walaaloow ma jiro wax khasaara ah oo soo gaaray ciidamadii la weeraray ee qaraxa loo adeegsaday, laakiin laba ruux oo rayid ahaa ayaa dhaawacyo fudu ka soo gaareen rasaas ay ciidamadu fureen, qaraxu wuxuu ahaa miino dhulka la galiyay” sidan ayuu SN u sheegay Cabdulle oo ku sugan Marko.
Maalmihii dambe waxaa soo badanayay falalka amni xumo ee kooxda Al-shabaab lagu eedeeyay, ee sida joogta ah uga dhaca magaalada Marko ee xarunta gobolka Shabeellaha hoose, waxaana maamulka dowladda ee magaaladu sheegeen inay jiraan rag ka tirsan Al-shabaab oo shacabka isku dhex qarinaya.
Salaamanews
Marko, Shabeellaha-hoose
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
