(Salaamanews)-Labo askari iyo la hayste faransiis ah ayaa ku geeriyooday weerar guul-dareystay oo xalay ciidamada sida gaar ah u tababaran ee dalka faransiisku ay ka fuliyeen Soomaaliya, sida uu sheegay wasiirka difaaca ee dalkaasi.
Ciidamada kumaandooska Faransiiska oo ay taageerayeen diyaaraha helicopters-ka ayaa xalay weeraray saldhig ay kooxda Al-shabab ku lahayd magaaladda Buulo Marer ee gobolka Shabeellaha hoose ee koonfurta Soomaaliya.
Weerarkaan ay qaadeen ciidamada faransiisku ayaa ujeedkiisu ahaa in ay ku soo furtaan sarkaal u dhashay faransiiska oo sanaddii 2009-kii lagu afduubay Soomaaliya, kaasi oo in muddo ah gacanta ugu jiray kooxda Al-shabab ee lala xiriiriyo Al-qaacida.
Dad goob joogayaal ah ayaa SN u sheegay in habeenkii xalay ahaa diyaarado dagaal ay duqeeyeen degmada Buula-mareer ee gobolka Shabeellaha hoose, halkaasina waxaa ku dhintay ciidamo ajaanib ah iyo saraakiil ka tirsan kooxda al-Shabaab.
Goob jooge aan magaciisa u qarinay sababo ammaan ayaa Salaamanews xaqiijiyay in diyaaradaha dagaalka oo ka koobnaa afar diyaaradood ay daadiyeen ciidamo badan, oo caddaan ahaa, kuwaasoo weerar fool ka fool ah ku qaaday ciidamada ururka al-Shabaab.
Labada dhinac waxaa soo kala gaaray khasaare dhimasho iyo dhaawac iskugu jira, waxaana warar madax bannaan ay xaqiijinayaan in ciidamada weerarka soo qaaday sidoo kale ay dileen saddex ruux oo rayid ah, kuwaasoo midkood uu ahaa nin oday ah oo waardiye ka ahaa dukaan ganacsi.
Gudoomiyaha gobolka Shabeellaha hoose C/qaadir Nuur Siidii ayaa SN u sheegay in weerarka ay soo qaadeen ciidamo Faransiis ah oo isku dayay inay soo badbaadiyaan la heystayaal Faransiis ah oo ay kooxda Shabaab afduubteen seddex sano ka hor.
“Weerarka waxaa lagu qaaday fariisimo maleeshiyaadka al-Shabaab ay ku lahaayeen degmada Buula-mareer waxaana ciidamadu isku dayayeen inay soo badbaadiyaan laheystayaal Faransiis ahaa oo kooxdu ay heysatay seddex sano” ayuu yiri Mr. Siidii.
Saraakiil ka tirsan ururka al-Shabaab ayaa warbaahintooda u sheegay in dagaalka ay soo qaadeen ciidamo Shisheeye, ayna isdifaaceen, isagoo sheegtay inay dileen ciidamo badan oo ka tirsanaa kuwii weerarka soo qaaday.
“Allaah waa fashilyay qorshihii gaalada Faransiiska Mujaahidiintu waxay Cadawga ka hayaan Meydadka Askar caddaan ah oo looga dilay dagaalkii Xalay”ayuu yiri Sarkaal u hadlay kooxda al-Shabaab.
Dhanka kale waxaa ay sheegayaan wararka ka imaanaya degmada Buula-mareer in ciidamada al-Shababa ay degmadaasi iskaga baxeen, iyagoo ka baqdin qaba weerar rogaal celis ah oo lagu soo qaado.
La-haysta u dhashay faransiiska ee xalay weerarkan lagu soo badbaadinayey ku geeriyooday oo lagu magacaabi jiray Denis Allex ayaa bishii Julaayo ee sanadkii 2009-kii isaga iyo saaxiibkiis oo billo kaddib la siidaayey lagu aduubay Soomaaliya oo ay u tageen in ay tababaro ciidan ka bixiyaan.
Salaamanews
Mark0, Shabeellaha-hoose
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
