(Salaamanews)-Dabley hubeysan ayaa Sabtida maanta ah weerartay Hotelka uu deganyahay wasiirka amniga Puntland, waxaana la sheegay dableydu inay baxsadeen markii ay weerarka soo qaadeen kadib.
Dableyda oo aan la garaneyn heybtooda iyo halka ay ka yimaadeen ayaa xalay weerartay hoteel uu ku sugnaa wasiirka amniga Puntland Khaliif Ciise Mudan.
Kooxda oo ku hubaysneyd qoryaha daran-dooriga u dhaca ayaa rasaas badan ku furtay hoteelka Panorama ee magaalada Boosaaso, halkaasoo uu ku sugnaa wasiirka iyo saraakiil ciidan.
Dad goob joogayaal ahaa ayaa sheegay in dableydu ay u muuqatay inay ka cabsaneysay ciidamada ilaalada Hotel-ka iyo askarta ku sugan xarunta SPU uu ku dhaw hoteelka uu ku sugnaa wasiirka.
Ilaalada wasiirka ayaa iyaguna rasaas xooggan ku jawaabay, mana cadda khasaaraha rasmiga ah ee ka dhashay is-rasaaseynta, waxaase la soo sheegayaa in dhaawaca shan ruux la dhigay cisbitaalka Boosaaso.
Maamulka Puntland ayaanan ka hadlin weerarka, mana jirto koox sheegatay masuuliyadiisa, laakiin warar hoosaad ay heleyso shabakaddan Salaamanews, ayaa waxay sheegayaan in weerarku uu aanu qabiil ku lug leeyahay.
Weerarka ayaa imaanaya labo maalin kaddib markii ciidanka Puntland ay sheegeen inay dileen saddex ka tirsan askarta ururka Al-Shabaab, shan kalena ay ka dhaawaceen kaddib markii ciidanka lagu soo weeraray saldhig 40 km u jira magaalada Boosaaso.
Salaamanews
Boosaaso, Bari
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
