(Salaamanews)-Xukuumadda Soomaaliya ayaa Jimcaha maanta ah Muqdisho ku soo bandhigtay seddex badmaaxi oo gacanta burcad badeedda ku jiray tan iyo sanadkii 2010-kii, xilligaasi oo laga qabsaday xeebaha dalka Soomaaliya.
Ra’isal wasaaraha xukuumadda Federaalka Soomaaliya mudane C/qaadir Faarax Shirdoon, ayaa wariyeyaasha u sheegay in dowladda Soomaaliya ay ku guuleysatay in la soo badbaadiyo badmaaxiyaashan oo aan laga bixin lacag madax furasho ah.
Ragga la soo bandhigay ayaa kala ahaa Ibraahim Cabdalla Jowri oo ah kabtanka markabka ay burcaddu qabsatay sanadkii 2010, oo lagu magacaabo MV Orna, Axmed Cabdalla oo ahaa injineerka markabka waxaana labadan shaqsi u dhasheen dalka Syria.
Qofka sedexaad ayaa u dhashay dalka Srilaanka, waxaana uu kamid ahaa shaqaalaha markabka la socday, soo badbaadinta laheystayaashan waxay ka dambeysay wada xaajood muddo socday oo ay sameysay dowladda Soomaaliya.
“Halkan waxaa ka muuqda maanta saddex qof oo afduub loogu qabsaday xeebaha Soomaaliya 20-kii bishii December 2010, waxaana xukuumaddu ay ku guuleysatay in laga soo daayo kooxihii gacanta ku hayay,” ayuu ra’iisul wasaaruhu ka sheegay munaasabaddii lagu soo bandhigay badmaaxiinta la soo furtay.
Mr. Shirdoon, ayaa soo badbaadinta laheystayaasha ku amaanay dadaal ay uu sameeyay wasiirka arrimaha gudaha iyo amniga qaranka C/kariin Xuseen Guuleed, oo sheegay in burcad badeedii lagu qanciyay wada hadal nabadeed.
La heystayaasha ayaa wariyeyaasha u sheegay inay aad ugu faraxsanyihiin soo badbaadinta xukuumadda Federaalka Soomaaliya, iyagoo sheegay in seddex sano ay xorriyad la’aan ahaayeen, waxaana la filayaa in xaafadahooda lagu celiyo.
Salaamanews
Muqdisho, Soomaaliya
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
