Halkaan ka daawo sawirradii kulankii madaxweynaha Soomaaliya iyo Hillary Clinton

Print - Daabace: SalaamaNews - Jan 20th, 2013 // Ka Jawaab

(Salaamanews)-Madaxweynaha Soomaaliya mudane Xassan Sheekh Maxamuud iyo wafdi uu hogaaminayo ayaa maalmihii ugu dambeeyey waxaa ay safar shaqo ku joogeen dalka Mareykanka, iyadoona uu madaxweynuhu kulamo la qaatay qaar ka mid ah madaxda dowladda Mareykanka oo uu ka mid yahay dhiggiisa Barack Obama iyo xoghayaha arrimaha dibadda ee Mareykanka Hillary Clinton.

Iyadoona uu madaxweynaha Soomaaliya mudane Xassan Sheekh Maxamuud, uu madaxda Mareykanka kala hadlay ummuuro fara badan oo ku saabsan xaaladda Soomaaliya iyo sidii dowladda Mareykanku ay gacan uga geysan lahayd dib-u-soo noolaynta Soomaaliya. Waxaana dowladda Mareykanku intii madaxweynuhu uu booqashada ku joogay ay ku dhawaacday in ay markii ugu horreysay aqoonsatay dowladda cusub ee Soomaaliya ka jirta kaddib muddo ka badan 21 sanno uusan Mareykanku xiriir dilumaasiyadeed oo toos ah la’lahayn Soomaaliya.

Dib u soo noolaynta xiriirkaasi ee uu Mareykanku ku dhawaaqay ayaa waxaa si weyn u soo dhaweeyey shacabka Soomaaliyeed iyo madaxda dowladda Soomaaliya, oo uu ka mid yahay madaxweynaha Soomaaliya Xassan Sheekh Maxamuud, waxaana uu sheegay in xiriirkaasi uu wax badan ka qaban-doono xaaladda iyo wajiga cusub ee ay Soomaaliya gashay, islamarkaana ay furi-doonto wadiiqo horumarineed iyo macaamil ay Soomaaliya toos ula yeelato dunida inteeda kale.

Halkaan hoose ka daawo sawirradii shirkii jaraa’id ee madaxweynaha Soomaaliya iyo xoghayaha arrimaha dibadda ee Mareykanka Hillary Clinton.