(Salaamanews)-Wararka ka imaanayo gobolka Bari ee maamulka Puntland ayaa waxaa ay sheegayaan in miino dhulka lagu aasay ay la kacday ciidamo ka tirsan maamulka Puntland.
Ciidamada oo ka soo tagay magaalada Boosaaso ee xarunta gobolka Bari ayaa ku sii jeeday buura leyda Galgala oo ay ciidanka Puntland dagaallo kula jiraan fallaago taabacsan kooxda Al-shabaab.
Wararku waxay tilmaamayaan in ciidamadii la socday gaariga ay miinadu la kacday ay badankood dhinteen kuwa kalena ay dhaawacmeen.
Wasiirka Warfaafinta isgaarsiinta, hidaha iyo dhaqanka ee Puntland Maxamuud Caydiid Dirir
Sida il wareed xaqiiqda ku dhaw ay noo xaqiijiyeen waxaa weerarka ku dhintay 13-ka tirsan ciidamada Puntland waxaana ku dhaawacmay 7-kale oo dhamaantoodba wada saarnaa gaariga.
Wariye Maxamed Yamani, oo ku sugan Boosaaso ayaa SN u sheegay in weerarka oo dhacay xilli habeen bar ah ay ku dhinteen askarta ka tirsan ciidanka Puntland.
Dhanka kale warsaxaafadeed maamulka Puntland uu soo saaray ayaa lagu sheegay in ururka Al-shabaab uu weerarka soo qaaday, kadibna ay iska caabin sameeyeen.
War-saxaafadeedka ayaa lagu sheegay inay koox aad u hubaysan oo ka tirsan al-Shabaab xalay abaare 11:00 PM dhowr jiho ka weerartay cutubyo ka tirsan ciidanka difaaca Puntland oo ku sugnaa meel u dhow deegaanka Galgala.
War-saxaafadeedka waxaa lagu sheegay inay ciidamada Puntland iska caabbiyeen weerarka, iyagoo dilay toddobo ka tirsanaa maleeshiyada al-Shabaab, isla markaana ay dhaawaceen 12 kale.
Puntland waxay sheegtay inay labo askari uga dhimatay dagaalka, halka toban kalena ay dhaawacmeen kaddib markii qarax miino lala beegsaday gaari ay saarnaayeen ciidamo kale oo Puntland ka tirsan oo gurmad ahaan ugu socday halka uu dagaalka ka dhacay.
Puntland ayaa aamisan in dad ka soo horjeeda siyaasaddeeda ay taageero iyo saanad milateri siiyaan maleeshiyada al-Shabaab ee ku sugan buuraleeyda gobolka Bari.
Salaamanews
Muqdisho, Soomaaliya
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
