(Salaamanews)-Ciidamda baliiska Puntland ayaa aad u xoojinaya ammaanka magaalada Garoowe ee caasimadda Puntland, iyadoo laga baqanayo firxadka kooxda Al-shabaab ee gaaray deegaannada Puntland inay geystaan falal amni xumo oo looga faa’iideysanayo siyaasadda isku hor gudban ee maamulka.
Muran aad u xoogan ayaa meeshii ugu darneyd hadda maraayo, kaasoo u dhexeeya siyaasiyiinta, waxgaradka iyo madaxweynaha talada haya xisbigiisa HORSEED, waxaana dadku ka soo horjeedaan in sanad uu kororsado madaxweyne Faroole oo la sheegayo in waqtigiisa uu kaga haray 6-maalmood.
Wararku waxay tilmaamayaan inaan magaalada Garoowe loo ogoleyn kuwa qaadacsan siyaasadda madaxweynaha, waxaana jira wafdi ka socda madaxtooyada oo kulamo waxgaradka kula kala qaadanaya magaalooyinka Garoowe, Boosaaso iyo Qardho.
Saraakiisha Puntland ayaa sheegay in ammaanka loo adkeeyay sababo la xiriira cabsi laga qabo in kooxda Al-shabaab ay geysato dil lamid ah midkii loo geystay taliyihii ciidamada baliiska Cabdullaahi Xuseen oo sanadkii hore la khaarijiyay.
Booliska ayaa la arkayay xalay iyagoo istaajinaya gaadiidka, waxaana la sheegay in howlgalka lagu qabtay dad aan la shaacin tiradooda.
Booliska ayaa sheegay in dilkii dhowaan magaalada loo gaystay Gaashaanle Sare Cabdullahi Xuseen loo qabtay dad lala xiriirinayo inay ka dambeeyeen dilkiisa, maxkamadna la soo taagi doono xilli dhow.
Puntland ayaan la ogeyn sida ay siyaasadeedu noqon doonto, waxaana laga cabsi qabaa in is afgara waaga taagani uu keeno dhiig badan oo daata, taasina waxay keeni kartaa isku dhac mar kale qarxo.
Salaamanews
Garowe, Puntland
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
