(Salaamanews)-Kooxda al-Shabaab oo laga saaray deegaanno horleh sanadihii 2011 iyo 2012 ayaa u muuqaneysa inay ka quusatay dagaalkeedii koofurta Soomaaliya iyadoo sii yaraaneysa dagaalka ay ka waddo bartamaha dalka Soomaaliya.
Al-Shabaab ayaa cudeeda military waxay ku dhisneyd ilaa shan qodob oo muhiim ahaa sida uu SN u sheegay sarkaal magaciisa u diiday qalabka war tabinta, oo mar dhaw uun ku biiray hey’adda Nabad sugidda qaranka kadib markii uu ka soo goostay ururka al-Shabaab.
“Ururku wuxuu ku dhisnaa maaliyad kaga timaadda shisheeyaha kooxda , lacagaha laga qaado shirkadaha isgaarsiinta iyo xawaaladaha, Dekedaha ay maamuli jireen, qabiillada oo la qasbi jiray iyo dadka qurba joogta oo fikrad badan aan kooxda ka heysan” ayuu yiri.
Al-Shabaab ayaa awoodeeda u wareejineysa dhinaca waqooyi ee Soomaaliya iyadoo dagaallo, dilal qorsheysan iyo qaraxyo ka billowday magaalooyinka maamul goboleedka Puntland.
Waloow kooxdu ay muddo ka soo jirtay dalka Soomaaliya, xiriir dhawna ay la leedahay ururka al-qaacidda oo ay ku biirtay 10-kii bishii February ee sanadkii hore 2012, Malaga yaabaa in ay kala jabto ama ay burburto? Su’aashaasi ayaan markale hor dhigay Sarkaalka ka goostay kooxda.
“Maya maya, marna lama dhihi karo kooxdu way burburtay ama way kala firxaneysaa, sababtoo ah, wali lama arag, hogaamiye muhiim ahaa oo ka soo goostay tan iyo markii ay laciiftay, hubkii ay laheyd wali lama soo helin, lamana oga goobaha rasmiga ah ay joogto al-Shabaabta runta ah iyo hogaankeeduba” ayuu ku jawaabay.
Sida horey loo ogaa kooxda al-Shabaab ayaa si’ qasab ah lacago uga qaadi jirtay shirkadaha isgaarsiinta iyo xawaaladaha, iyadoo lacagtaasi u adeegsaneysa dagaalka ay kula jirto xoogaga dowladda iyo taageerayaashoodu, waxaana ay u hanjabtay dhowr shirkadood oo ay culeys saartay.
Milkile Shirkad kamid ah kuwa xawilaadaha ayaa noo xaqiijiyay in leysku yeeray dhamaan laamaha shirkadaha isgaarsiinta iyo xawaaladaha oo kulan loogu qabtay magaalada Buula-burte ee gobolka Hiiraan, wuxuuna sheegay in loogu hanjabay in la beegsan doono hadii aanay bixin lacago loogu magac daray “kaalmeynta muhaahidiinta”.
Milkilahaasi oo naga codsaday inaan magaciisa iyo shirkadiisa aan qarino sababo ammaan ayaa xusay in shirkadaha sida ay u kala awood badanyihiin looga qaadi doono lacagaha ay rabaan saraakiisha al-Shabaab.
“Lacagta ugu yar ee leyska rabo, waa $5,000 (shan kun oo dollar), shirkadii bixin weydo 25-ka bil kasta waxaa lagu dari doonaa liiska kuwa taageersan ‘ridada’, taasina waa layaab kale” ayuu yiri.
Kooxda al-Shabaab ayaa dhawaan digniin u jeedisay shirkadaha isgaarsiinta dalka oo ay ku eedeysay inay ka qeyb qaadanayaan taageerada dadka ku nool goobaha ay dowladdu maamusho, iyo inay ka qeyb qaadanayaan sharci loo sameynayo isgaarsiinta iyo warbaahinta.
AL-Shabaab, ayaa horey ugu caan baxday caburinta shaqsiyaadka ay u arkaan inaanay ka maarmin meelaha ay maamulaan ciidankeedu, waxaana wer wer badan uu soo wajahay shirkadaha xawilaadaha iyo kuwa isgaarsiinta ee xarumaha ku leh meelaha ay kooxdu maamusho.
Salaamanews
Muqdisho, Soomaaliya
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
