(Salaamanews)-Wararka ka imaanaya gobolka Galgaduud ayaa sheegaya in kooxda Al-shabaab ay xirtay culimo badan oo ay ku eedeeysay inay aaminsanyihiin fikirka “Suufiyadda”, ee culimaa’udiinka Ahlu sunnah waljamaacah.
Kooxda Al-shabaab ayaa soo saartay amar lagu xiraayo culimada aan iyaga la shaqeyn waxaana maanta la raafay dhamaan culimadii magaalada Ceeldheere ee gobolka Galgaduud.
Warar lagu kalsoonyahay oo ku dhaw kooxda Al-shabaab ayaa sheegaya in horjoogaha kooxda Al-shabaab ee gobolka Galgaduud Xasan Yacquub, uu amray in xabsiga la dhigo dhamaan culimada heysta madhabka aanay rabin kooxda Al-shabaab.
Goob jooge magaciisa sababo amaan u qariyay ayaa taleefanka Ceeldheere SN ugu sheegay in qafaalka culimada uu billowday goor hore oo Jimcaha maanta ah, mana jirto sabab cad oo culimad loo xabsiyay.
Guddoomiyihii hore ee degmada Ceeldheer Xuseen Maxamed ayaa saxaafadda u sheegay in ururka Al-shabaab ay culimada xirtay kaddib markii ay ka biyo diideen inay Al-Shabaab dagaalyahanno u qoraan.
“Kooxda Al-shabaab ee khawaarijta ah ayaa xirtay 100-macallin oo diiday inay askar u qoraa, waxaa macallimiintu lagu eedeeyay inay qabaan fikirka culimada ahlu sunnah” ayuu yiri Maxamed.
Culimada la xiray ayaa isugu jiray macallimiin dugsiyo qur’aan, wadaaddo kitaabbada cilmiga dadka bara iyo mashaa’iiq kale, mana jirto eedo muuqda oo ay geysteen.
Mr. Maxamed ayaa sheegay in culimada lagu xiray xero ay kooxda Shabaabtu ku leedahay degmada Ceeldheere, waxaana jirin dadaal ay dad dhiirran kara ku soo badbaadi karaan macallimiinta.
Salaamanews
Dhuusa-marreeb, Galgaduud
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
