(Salaamanews)-Tan iyo markii la dhisay maamulka Khaatumo State ee Soomaaliya ayaa waxaa uu maamulku qabtay waxyaabo badan, wuxuuna maanta xusay sanadguuradiisii koowaad ee ka soo wareegtay markii la dhisay.
Sanad guuradii koowaad ee maamulka Khaatumo ee Soomaaliya ayaa maanta looga dabbaal-degay meelo kala duwan oo ka tirsan deegaannada uu maamulka ka arrimiyo iyo dalka dibbadiisa.
Dabbaal degyo ayaa lagu qabtay Taleex, oo ah magaalada lagu sameeyay maamulka Khaatumo, iyo dhowr magaalo oo kale oo ku yaalla gobolka oo ay ka mid yihiin Buuhoodle, Boocame iyo Awr-Boogays. Dabbaal-degyo kuwan oo kale ah ayaa lagu qabtay dalal ka baxsan Soomaaliya.
Dabbaal-deggii lagu qabtay magaalada Taleex waxaa ka qeyb-galay Axmed Cilmi Cismaan, oo ka mid ah madaxweynayaasha saddexda ah ee maamulku leeyahay, waxaana munaasabaddaas lagu soo hadal-qaaday waxyaabaha u qabsoomay maamulka muddadii halka sano ee uu jiray iyo weliba qorshayaasha hor yaalla mustaqbalka.
Maamul goboleedka Khaatumo waxaa lagu dhisay magaalada Taleex horraantii sanadkii 2012 si uu u matalo dadka ku nool gobollada Sool, Sanag iyo Cayn.
Maamulka ayaa haykal ahaan u dhisan qaab asaga u gaar ah, wuxuuna leeyahay saddex madaxweyne oo qaab meerto ah xukunka ula kala wareega labo jeer sanadkiiba.
Dhanka kale dagaallo u dhexeeyay maamulka Khaatuma State iyo Somaliland ayaa maanta ka dhacay degmada Xudun ee magaalada Laascaanood, dagaalkaasina waxaa ka dhashay khasaaro xoogan.
Salaamanews
Hargeisa, Somaliland
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
