Madaxweynaha Soomaaliya Xasan Sheekh Maxamuud iyo wafdi ballaaran oo uu hoggaaminayo ayaa si wayn loogu soo dhaweeyey magaalada London dalka Ingiriiska oo booqasho rasmi ah ay ugu billaabatay.
Madaxweynaha ayaa sheegay in casuumad rasmi ah uu ku helay ra’iisul wasaaraha Ingiriiska David Cameron oo uu sheegay inay ka wada hadli doonaan arrimo ay ka mid yihiin sida dowladda ingiriiska ay u xoojin lahayd taageerada ay siiso dowladda iyo shacabka Soomaaliyeed.
Madaxweyne Xasan iyo ra’iisil wasaare Cameron ayaa la filayaa inay si gaar ah ugu hadli doonaan shir arrimaha Soomaaliya ku saabsan oo bisha May ka dhici doona dalka Ingiriiska.
Xasan Sheekh Maxamuud waxa uu sheegay inuu sidoo kale la kulmi doono qaybaha kale duwan ee dowladda Ingiriiska si uu ugu muujiyo in Soomaaliya ay ka soo kabaneyso dagaaladii iyo colaadihii muddada dheer ka taagnaa, wakhtigana loo baahan yahay in la gacan qabto Soomaaliya.
Madaxweynaha ayaa sheegay inuu kulamo la qaadan doono jaaliyadda Soomaaliyeed ee ku nool Ingiriiska, kuwaasoo oo uu u bandhigi doono qorshaha dowladda iyo kaalinta looga baahan yahay in qurbajoogta Soomaaliya ay ka qaataan dib u dhiska dalka
Socdaalka madaxweyne Xasan uu ku tagay Ingiriiska ayaa ku soo beegmay xilli uu soo dhameysatay booqasho uu ku joogay xarunta Midowga Yurub, halkaas oo madaxda Midowga Yurub ay ugu ballan-qaadeen in ay taageero xogan u fidin doonaan dowladda Soomaaliya.
Dhowaan ayay ahayd markii dowladda Maraykanka ay shaacisay in ay si rasmi ah dib ugu soo celisay xiriirkii diblumaasiyadeed ee kale dhaxeeyey dowladda Soomaaliya.
Isha: Barkulan
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
