(Salaamanews)-Dhawaan ayaa maamulka dowladda ee magaalada Baydhabo wuxuu xabsiga dhigay madixii hey’adda FAO ee gobolka Baay, kadib markii lagu tuhmay masuqmaasuq dhinacyo badan taabanayay.
Taliyaha ciidamada baliiska ee magaalada Baydhabo Mahad C/raxmaan Aadan, ayaa warbaahinta u sheegay in xariga madaxa hey’adda FAO uu ka dambeeyay tuhun la xiriira inuu la shaqeyn jiray kooxda Al-shabaab oo horey looga saaray magaalada Baydhabo.
Madaxa hey’adda FAO Idiris Cabdi Dhakhtar, ayaa lagu tuhmay inuu la shaqeynayay Al-shabaab waloow taliyuhu uusan soo bandhigin cadeymo hadana wuxuu xaqiijiyay in iyagu ay gacanta ku hayaan ninkaasi.
“Idiris Cabdi Dhakhtar, annaga ayaa xiranay waxaana lagu tuhmay inuu la shaqeynayay Al-shabaab, hadii cadeymo lagu helo waanu iska sii deyn doonnaa hadii kale maxkamadda ayaa go’aan ka gaareyso” ayuu yiri taliye Aadan.
Mr Idiris oo muddo deganaa magaalada Baydhabo ayaa la sheegay inuusan magaalada ka tagin xilligii ay maamuleysay kooxda Al-shabaab, taasoo keentay shakiga ku aadan xiriirkiisa Al-shabaab.
Xilli habeen ah ayaa lagala baxay hooygiisa waxaana muddo leysla dhexmarayay In kooxda Al-shabaab uu u xiranyahay Idiris, maadaama hey’adiisu ay horey uga mamnuuceen gobolka Baay.
Al-shabaab ayaanan ka hadlin xariga Idiris, sidoo kale ma jiro wax war ah oo ka soo baxay hey’adda beeraha ee qaramada midoobay ee uu u shaqeynayay.
Salaamanews
Muqdisho, Soomaaliya
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
