(Salaamanews)-Xafiiska siyaasadda ee Qaramada Midoobay u qaabilsan Soomaaliya (UNPOS) ayaa cambaareeyay weerarrada argagaxisada ee Soomaaliya ka dhacay labadii toddobaad ee la soo dhaafay, oo uu ku jiro falkii lagu dilay Sheekh Cabdiqaadir Nuur Faarax.
Alle ha u naxariistee, Sheekh Cabdiqaadir Nuur Faarax ayaa Jimcihii la soo dhaafay lagu dilay gudaha masaajid ku yaalla magaalada Garoowe ee xarunta maamulka Puntland isagoo tukanayay salaadda Casar.
Madaxa xafiiska UNPOS Augustine Mahiga ayaa war qoraal ah ku cambaareeyay dilka sheekha, qaraxii ismiidaaminta ahaa ee gaariga loo adeegsaday ee lagu bar-tilmaameedsaday taliye ku xigeenka booliska Puntland Jeneraal Muxiyaddiin Axmed Muuse oo xilligaas ku sugnaa magaalada Gaalkacyo, qaraxii gaariga loo adeegsaday ee ka dhacay maqxi ku taalla xeebta Liido ee magaalada Muqdisho iyo dilkii loo geystay madaxa sirdoonka degmada Shibis.
Mahiga wuxuu tacsi u diray qoysaska dadkii lagu dilay falalkaas argagaxisada ah oo kooxda al-Shabaab ay sheegatay mas’uuliyadda weerarradaas badankood.
Sidoo kale wuxuu caafimaad deg-deg ah u rajeeyay dadkii lagu dhaawacay weerarradaas kala gadisan.
Wuxuu ugu yeeray shacabka Soomaaliyeed inay kala shaqeeyaan madaxdooda sidii kuwa dambiilayaasha ah ee ka dambeeya falalkan foosha xun loo hor geyn lahaa caddaaladda.
Warka qoraalka ah ayuu Mahiga ku sheegay in xafiiska UNPOS uu ka go’an yahay sidii uu dowladda Soomaaliya uga taageeri lahaa adkaynta ammaanka oo ah mudnaanta koowaad ee xukuumadda,” isagoo intaas raaciyay inaaney oggolaan doonin in falalkan fulaynimada ah ay carqaladeeyaan horumarka taariikhiga ah ee la sameeyay tobankii bilood ee la soo dhaafay.
Salaamanews
Nairobi, Kenya
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
