(Salaamanews)-Madaxda maxkamadda ciidamada qalabka sidda ee Soomaaliya ayaa Sabtida maanta ah kulan ay yeesheen kadib waxaa xukunno adag la duldhigay saraakiil sare oo ka tirsanaa hogaanka ciidamada baliiska iyo Militariga ee dowladda Soomaaliya.
Xukunka maxkamadda ciidamada qalabka sidda ayaa iskugu jira xilka qaadis, shaqa ka joojin iyo xarig, waxaana maxkamaddu ay sheegtay in cadeymo lagu helay saraakiisha ciidamada ee xukunnada lagu fuliyay.
Gudoomiyaha Maxkamada Ciidamada Qalabka-Sida Liibaan Cali Yarow oo xukunka maxkamada ku dhawaaqay ayaa sheegay in saraakiisha la soo eedeeyay uu ka mid yahay taliyihii ciidanka Asluubta Soomaaliyeed Sarreeye Guuto Cabdi Maxamed Ismaaciil.
“Taliye Cabdi Maxamed, wixii maanta ka dambeeyo waa laga saaray ciidamada, waa laga qaaday xilkii uu hayay, waxaana uu qirtay inuu dambiga galay iyadoo maxkamaddu ay cadeymo heshay” ayuu yiri Gudoomiye Yaroow.
Gudoomiyaha ayaa sheegay in xabsi daa’in uu ku xukuman yahay Mr Cabdi Maxamed, wuxuuna intaa raaciyay in xabsi uu nolashiisa inta ka dhiman ku dhameysan doono.
Gudoomiyaha Maxkamada Ciidamada Qalabka Sida Liibaan Cali Yarow ma uusan sheegin eedeymaha loo heystay sarkaalkan waxa ay yihiin,Sareeye Guuto Cabdi Maxamed Ismaaciil waa sarkaalkii ugu sareeyay ciidanka asluubta.
Bilihii u dambeeyay ayaa saraakiisha dawladu waxay aad u hadalhayeen maxaabiis qaarkood ka tirsanaayeen ururka Al Shabaab oo laga siidaayey xabsiga dhexe ee magaalada Muqdisho iyo xabsiga Baydhabo oo labaduba ay maamusho dawlada.
Sidoo kale waxaa warar soo baxaya ay sheegayaan in musuqmaasuq weyn uu hareeyay xabsiyada dawlada oo dadka la soo qabto lagu kala bedesho lacago aad u fara badan oo saraakiisha ay qaataan.
Lama oga in xukunka maxkamada ciidamada ay maanta ku riday sarkaalkii ugu sareeyay ciidanka asluubta uu la xiriiro tuhunadaasi iyo in kale.
Waxay maxkamadu sheegtay in saraakiil kale oo ciidamada ka tiraan iyana dhowaan la xukumi doono marka la soo dhameystiro eedeymaha loo heysto.
Maxkamada Ciidamada ayaa maxkamad qaada dacwadaha la xiriira ciidanka iyo kooxaha hubeysan, waxaana ay horey u gaartay xukuno kala duwan oo ay ku jiraan dilal ay ku xukuntay askar ciidamada ka tirsan oo falal xadgudubyo ah u geystay dad rayid ah.
Salaamanews
Muqdisho, Soomaaliya
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
