(Salaamanews)-Madaxweynaha Puntland Cabdiraxmaan Sheekh Maxamed Faroole ayaa shalay magaalada Garoowe wuxuu kula kulmay wafdi ka socday Midowga Yurub oo uu hoggaaminayay danjiraha Midowga Yurub u qaabilsan Soomaaliya Michele Cervone d’Urso.
Labada mas’uul ayaa ka wada-hadlay nidaamka xisbiyada badan ee maamulka Puntland, arrimaha ammaanka, dimuqraadiyadda iyo xuquuqda aadanaha.
Guddiga fulinta ee Midowga Yurub u qaabilsan dimuqraadiyaynta ayaa ballan-qaaday inuu taageero farsamo iyo mid dhaqaaleba la garab taagan yahay nidaamka cusub ee uu ku tallaabsaday maamulka Puntland.
Wafdiga Midowga Yurub wuxuu muujiyay sida bulshada caalamka ay uga go’an tahay la falgelidda hannaanka dimuqraadiyaynta Puntland iyo sida ay u soo dhoweynayaan horumarka la gaaray ilaa hadda oo la furay xisbiyo siyaasdeed iyadoo ay is diiwaan geliyeen lix urur siyaasadeed.
Guddiga fulinta ee Midowga Yurub u qaabilsan dimuqraadiyaynta wuxuu rajeynayaa sii ballaarinta xorriyadda siyaasadeed toddobaadyada soo socda, iyadoo ururrada siyaasadda ay billaabi doonaan xulashada musharraxiintooda doorashada goleyaasha deegaanka oo lagu wado inay dhacdo bisha May ee sanadkan.
Guddiga fulinta ee Midowga Yurub u qaabilsan dimuqraadiyaynta waxaa xubno ka ah koox toddobo deeq bixiyayaal ka kooban.
Salaamanews
Garoowe, Puntland
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
