(Salaamanews)-Arbacada maanta bisha dul-xaja waa sideed waana mid kamid ah maalmaha ugu shaqada badan xajka oo ay sanadkan gudanayaan dad gaaraya toban kun oo ruux oo ka kala socda shanta qaarad ee dunida.
Soomaalida xajka ka qeyb galeyso oo boqllaal ah ayaa waxay qaarkood ku suganyihiin magaalooyinka barakeysan ee dalka Sacuudiga waxayan gudanayaan acmaasha xajaka ee eebbe umadiisa ku waajibyeelay.
Xujeyda waajibka eebbe gudanaya ee sanadkan xajinaya ayaa waxaa kamid ah Wasiiru dowlaha wasaaradda Owqaafta iyo arrimaha Diinta dowladda Soomaaliya Sheekh Axmed C/llaahi Xuseen Fanaax wuxuuna sheegay isagoo ku sugan magaalada barakeysan ee Maka in maanta ay tahay mid ka mid ah maalmaha ugu muhiimsan acmaasha Xajka.
Shiikha ayaa intaasi ku daray in dowladda Sacuudigu ay diyaarisay dhamaan adeegyadii lagama maarmaanka u ahaa gudashada waajjibaadka Xajka, wuxuuna ku amaanay doorka ay ka ciyaareyso kaalmeynta dadka da’da ah ee gudanaya wajibka xajka.
Xaaji Axmed C/llaahi Fanax ayaa tilmaamay in ay jiraan dhibaatooyin sanadkan soo foodsaaray Xujeyda Soomaalida, maadaama xujeyda kale ay daryeel ka helaan dowladahooda, iyadoo xujeyda Soomaliduna aysan laheyn Safaarad u dhameystirta waxyaabaha ay u baahanyihiin.
Xujeyda ayaa ka baxaya agaalada Maka iyaga oo u socda Magaalada Mina halkaasi oo ay ku nasan doonaan caawa kuna dukan doonaan, Khamiista berri ah waxa ay tagayaan buurta Carafo.
In ka badan hal milyan iyo bar qof oo muslim ah ayaa xajka inay gutaan u jooga Sacuudi Carabiya, Masuuliyiinta dalka Sacuudiga ayaa sheegay in degenaansho la’aanta ka jirta gobolka aanay saameyn doonin gudashada waajibaadka Xajka.
Waxaa la dhigay ciidamo ammaanka ilaaliya meel walba oo lagu gudanayo waajibaadka Xajka, Haddaba goor dhaweyd ayaa la xiriiray oo aan wareystay qaar ka mid ah xujeyda Soomaalida ee sanadakan gudaneysa waajibaadka Xajka waxayna muujiyeen dareen farxadi ay ku jirto iyagoo sheegay inay rajeynayaan acmaal wanaagsan.
Cabdishakuur Shakra, Salaamanews
shakra@salaamanews.com
Muqdisho, Soomaaliya
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
