(Salaamanews)-Wariyeyaal aad u farabadan oo ka careysnaa warbixin meel ka dhac ah oo laga qoray wariyeyaasha Soomaaliyeed ayaa waxaa uu maanta ka dhacay barxadda aqalka Hooyooyinka ee magaalada Muqdisho.
Wariyeyaasha ayaa ka careysnaa dhammaantood warbixin uu daabacay wargeyska The guardian ee ka soo baxa magaalada London ee carriga Britain iyo talefashinka Chanel-4, oo labaduba warbixinta ka soo xigtay wariye Soomaali ah oo lagu magacaabo Jamaal Cismaan.
Banaan baxa, waxaa soo abaabulay wariyeyaasha Soomaaliyeed ee ku sugan Muqdisho, waxaana ka soo qeyb galay bahda warfidinta qeybahooda kala duwan sida wariyeyaasha ka shaqeeyo idaacadaha gudaha Muqdisho, Idaacadaha dibadda, Wargeysyada dalka iyo dibadda, Talefashinada, iyo wakaaladaha, waxaana dhammaan wariyeyaashu ay sheegeen inaan la qaadan karin warka lagu aflagaadeeyay wariyeyaasha Soomaaliyeed.
Wariyeyaasha oo careysan
Wariyeyaasha qaarkood oo goobta ka hadlay ayaa dareenkoooda muujiyay, waxayna sheegeen inaan lagu ceebeyn Karin wax ayna iyagu ahayn, oo ay dad gaar ah wataan, isla markaana waxay cadeeyeen in qorshaha Jamaal Cismaan uu warbixinta ku soo daabacay uu ahaa mid qallafsan.
Warbixinta wariyeyaasha lagu ceebeeyay, ayaa waxaa lagu soo qaaday labo qodob, waa tan koowaade waxaa warbixinta ay muujisay in wariyeyaashii dhintay ay sababsadeen lacag loo yaqaan Sharuur oo wariyeyaashu ka soo qaataan Madaxda ay wareystaan, waa tan labaade waxaa la daabacay in wariyeyaashu ay u dhinteen qabiil wararkooduna ay u dhigaan qaab dan gaar ah ay ugu jirta qolo ama qabiil gooni ah.
Warbixinta ayaa waxaa lagu daabacay wargeyska The guardian 11-kii bishan October ee sanadkan 2012, waxaana ay muujisay waxyaabo badan oo aan sal iyo raad midna laheyn, sida ay wariyeyaashu sheegayaan, iyagoo ku sababeeyey taasi in aysan warbixintu lahayn wax xigasho ah.
Dibad baxa wariyeyaasha
Dibad-baxa maanta waxaa ka soo qeyb galay masuuliyiinta ururuka Suxufiyiinta qaranka Soomaaliyeed ee NUSOJ, waxaana halkaasi ka hadlay xoghayaha guud ee ururkaasi, Maxamed Ibraahim Bakistan, oo sheegay in warbixintan ay tahay dhibaatadii ugu weyneyd oo ay kala kulmaan wariyeyaasha Soomaalidu, isla markaana aaan loo dulqaadan Karin in wariyeyaasha Soomaaliyeed lagu sharaf dilo xog aan cadeyn loo heyn.
“Warbxiintaas waanu canbaareynaa waxaana ugu baaqeynaa Madaxda wargeyska the guardian inay raali galin ka bixiyaan warkaas meel ka dhaca ku ah wariyeyaash Soomaaliyeed, hadii aanay taasi sameyn waxaanu wariyeyaasheenna u sheegi doonaa inay wada shaqeynta ka joojiyaan Saxaafadaas baahisya warbixinta been abuurka ah” ayuu yiri Maxamed Ibraahim Bakistan.
Xoghayaha Nusoj Maxamed Ibraahim oo wareysi siinaya Salaama News (www.salaamanews.com)
Markii uu dhammaaday dibada wariyeyaashu ay dhigayeen ayaan waxaa wareysi la yeeshay Maxamed Ibraahim Bakistaan, oo ah xoghayaha ururka NUSOJ, isagoo iiga waramay dareenkooda ku aadan warbixintaan iyo saameynta ay ku yeelan karto wariyaasha Soomaalida oo horray ula daaladhacayey dhibaatooyin isugu jiray dil, hanjaabad iyo waliba xarig.
Hadaba halkaan ka dhageyso Wareysiga Maxamed Ibraahim Bakistan
Cabdishakuur Shakra, Salaamanews
shakra@salaamanews.com
Muqdisho, Soomaaliya
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
