(Salaamanews)Aasaaska ciidamada baliiska Soomaaliyeed oo haatan laga joogo 69-sano ayaa maanta oo kale laga xusayaa dhammaan gobollada dalka Soomaaliya, waxaana maalintan ay kamid tahay baryaha sida gaarka ah ay u qiimeyso bulshada Soomaalida oo helay ciidan si gaar ah dantooda uga shaqeeya.
Ciidamada baliiska Soomaaliyeed waa kuwa har iyo hameen u taagan u shaqeynta bulshada waxaana ay difaacaan damiirka umadda Soomaaliyeed, iyagoo dusha u dhiganaya dhibaatada kaga imaaneyso bulshada ka kooban shaqsi xun iyo mid fiican intaba.
Munaasibad si weyn loo soo qaban qaabiyay oo lagu weyneynayo maalintan maamuuska mudan ayaa ka dhaceyso dugsiga tababarista ciidamada baliiska Soomaaliyeed Jeneraal Kaahiye ee magaalada Muqdisho, waxaana masuuliyiinta halkaasi ka qeyb galay ay muujiyeen dowrka baliiska uu ku leeyahay dalka inuu nabad noqdo.
Taliyaha ciidamada baliiska ahna afhayeenkooda Shariif Shiikhuna ayaa sheegay in ciidamada baliisku uu soo hagaagay anshaxooda ayna la jaanqaadayana isbadalka ka dhacayo caasimadda Muqdisho iyo guud ahaan dalka Soomaaliya.
Mr. Shariif ayaa sheegay in baliisku ay dul qaad u yeeshaan dhibaatada kaga imaaneyso shacabka, isagoo xusay in lagama maarmaan ay tahay in la weyneyo booska ay ku leeyihiin kalsoonida shacabka Soomaaliyeed.
Munaasibadda waxaa ka hadlay madaxda gobolka Banaadir iyo masuuliyiinta dowladda Soomaaliya, oo sheegay in qiimo ay leeyihiin ciidanka baliiska oo mudadii burburka aan helin kaabayaasha baahidooda aas aasiga ah.
Munaasibado kuwan lamid ah ayaa ka dhacayo gobollada dalka sida maamullada Galmudug iyo Puntland, waxaana leysku dayayaa in ugu yaraan murti lagu muujiyo sida ay boos muhiim ah u joogaan ciidamada baliiska Soomaaliyeed.
Xarunta Jeneraal Kaahiye ee Muqdisho waxaa maanta iskugu yimid dhamaan saraakiisha ciidamada baliiska waxaana goobta saf dheer ka galay ciidamada baliiska qaranka Soomaaliyeed oo dhoola tus ciidan sameeyay iyagoo salaan sharaf ka qaatay madaxda wadanka.
Waa markii ugu horreysay muddo labaatan sano ah ay dhacdo munaasibad middan lamid ah oo lagu xusayo sanad guurada 69-aad ee ka soo wareegtay aas aaska ciidamada baliiska Soomaaliyeed.
Salaamanews
Muqdisho, Soomaaliya
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
