(Salaamanews)- Wasiirka arrimaha dibedda ee maamulka Somaliland Maxamed Cabdullaahi Cumar ayaa shaaca ka qaaday inay dib u furmi doonaan wada-hadalladii u dhaxeeyay dowladda federaalka Soomaaliya iyo maamulka Somaliland, ku dhowaad toddobo bil kaddib markii ay labada dhinac qaateen wareeggii koowaad ee wada-hadallada.
Maxamed wuxuu sheegay in wada-hadallada ay daba joogaan wada-hadalladii ka kala dhacay Britain iyo Imaaraadka Carabta bartamihii 2012.
Wuxuu sheegay inuusan maamulkiisu aqbali doonin in shaqsiyaad ka soo jeeda “Somaliland” ay ka qeyb-galaan wada-hadallada iyagoo matalaya dowladda Soomaaliya.
Hadalka wasiirka ayaa imaanaya maalin kaddib markii raysul wasaare Cabdi Faarax Shirdoon uu shaaciyay hadal kan la mid ah oo la xiriiray dib u furmashada wada-hadallada u dhaxeeya labada dhinac.
Bartamihii sanadkii tegay ayay ahayd markii ugu horreysay ee ay dowladda Soomaaliya iyo maamulka Somaliland si rasmi ah isu soo hor fariistaan tan iyo markii ay Somaliland iskeed ugu dhawaaqday inay gooni isu taagtay oo ay tahay dal ka madax-bannaan Soomaaliya inteeda kale.
Waxay labada dhinac wada-hadalladii billowga ahaa ku heshiiyeen inay iska kaashadaan la dagaallanka argagaxisada iyo burcad badeedda iyo sii wadidda wada-hadallada, walow aan shirarkii dhacay la iskula soo qaadin qadiyadda gooni-isu-taaga iyo aqoonsiga ay doonayso Somaliland.
Somaliland ayaa oggolaatay inay wada-hadallo la gasho dowladda Soomaaliya February 2012 xilligaas oo London lagu qabtay shir-weyne looga hadlayay arrimaha Soomaaliya oo ay marti-gelisay dowladda Britian, isla markaana ayka soo qeyb-galeen 40 madax dowladeed.
Maamulka Somaliland ayaa ku adkeysanaya inuusan ka tanaasuleyn go’aankiisa la xiriira gooni isu-taaga-wuxuuna doonayaa in dowladda federaalka ay aqoonsato madax-bannaanidiisa.
Salaamanews
Hargeisa, Somaliland
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
