Warshad soo saarta waraaqaha, kartoonaad wax lagu rito iyo buugaagta iskuulada ee ardada–taas oo ah arintii ugu horaysay ee shaqdeeda ay Soomaaliya ka bilaabato mudo labaatameeyo sano ah–ayaa laga furay Hargaysa usbuucii la soo dhaafay.
Samaynta Warshada Waraaqaha ee AADCO ayaa shaqadeedu socotay ilaa 2009-kii, milkiilaha Aadan Barado ayaa sidaas ka sheegay xafladii furitaanka ee Sabtidii (Janaayo 5-teedii) la qabtay.
“Wakhti badan ayay qaadatay sababta oo ah waxaan joognaa wadan la burburiyay,” Barado ayaa sidaas sheegay, isaga oo intaas ku daray in aysan sahlanayn in warshad laga bilaabo Soomaaliya iyada oo aysan jiran wax kaalmo ah oo arimhaas kuu sahlaya.
Warshada ayaa dhismaheedu bilawday Janaayo 2012, dhamaadayna Diisember.
![Shaqaale ka shaqaynaya Warshadda Waraaqaha AADCO ee dhawaanta la furay. [Barkhad Dahir/Sabahi]](http://salaamanews.com/somali/wp-content/uploads/2013/01/AADCO-Hargeisa-Plant-300x199.jpg)
Shaqaale ka shaqaynaya Warshadda Waraaqaha AADCO ee dhawaanta la furay. [Barkhad Dahir/Sabahi]
16-kii saacba, warshadu waxay soo saaraysaa 70,000 oo buug, kuwaas oo diyaar u ah in suuqa lagu iibiyo, ayuu u sheegay Sabahi. Warshadu waa mid bay’ada u fiican isticmaashana nidaam yaraynaya sawaxanka badan iyo qiiqa, ayuu yidhi.
Tani waa warshadii ugu horaysay ee nooceeda oo kale ah oo Soomaaliya laga furo ilaa iyo markii ay dawlada dhaxe dhacaday labaatameeyo sano ka hor, Nuur ayaa sidaas yidhi. Kharasha guud ee mashruucan ku baxay qiyaastii waa $5 milyan oo doolar.
Xiliga wajiga hore, warshada waxaa loogu tala galay in ay daabacdo buugaagta layliga ah ee ardada, Agaasimaha Guud ee warshada Xasan Nuur ayaa u sheegay Sabahi. Dhawrka bilood ee ugu horeeya 2013, waxay kale oo soo saaraysaa waraaqaha xafiisyada ee A4, buugaagta wax lagu qorto iyo kartoonada wax lagu rito, ayuu yidhi.
Dadaal loogu jiro in la joojiyo alaabaha warshada in dibada laga keeno, ayaa shirkadu sanadkan dhamaadkiisa ay samayn doontaa alaabteeda si ay waraaqo u samayso. “Waxaan rabnaa in aan isaga filaano alaabta daacaba oo wax soosaarkaanagu u baahn yahay, taas oo aan hada ka soo iibsano Shiinaha,” Nuur ayaa sidaas yidhi.
“Hadafkaanagu waa in aan waxsoosaarkaanaga ka iibino Soomaaliya oo dhan iyo wadamada dariska ah sida Jabuuti iyo Itoobiya,” ayuu sheegay.
Waxsoosaarka maxalliga ah oo xaalada wanaajinaya
Warshada cusub ee waraaqaha ayaa dadka gobalka ka kaalmaynaysa in ay lacag badan kaysadaan taa soo kaga bixi jirtay buugaata iyo waraaqaha xafiiska ee ay dibada ka keensadaan. Maxamed Shukri Jaamac, oo ah Gudoomiyaga Golaha Ganacsiga, Warshadaha iyo Beeraha ayaa sidaas yidhi.
“Waxay kordhin doontaa shaqo abuurka, cilmiga iyo maalgashiga, waanan soo dhawaynaynaa,” ayuu yidhi.
![Shaqaalaha oo rastaynaya buugaag, waraaqaha xafiisyada iyo kartoonada wax lagu rito iyaga oo jooga Warshadda Waraaqaha ee AADCO. [Barkhad Dahir/Sabahi]](http://salaamanews.com/somali/wp-content/uploads/2013/01/hargeisa-women-factory-300x199.jpg)
Shaqaalaha oo rastaynaya buugaag, waraaqaha xafiisyada iyo kartoonada wax lagu rito iyaga oo jooga Warshadda Waraaqaha ee AADCO. [Barkhad Dahir/Sabahi]
Wuxuu sheegay in xaaladaha cakiran, sida la’aanta taageerida dawlada, daymaha oo aysan heli karin iyo gar gaar xaga dawlada ahba, ay jalaafayn karaan waxsoosaarka maxaliga ah. Si loo kaalmeeyo warshadaynta maxaliga ah, canshuurta alaabta dibada laga keenayo waa in la kordhiyaa, si ay dadku u iibsadaan alaabta sida maxaliga ah loo soo saaro, ayuu yidhi.
Wasiirka Ganacsiga, Warshadaha iyo Dalxiiska Cabdirisaaq Khalif Axmed, kaas oo ka hadlay xafladii furitaanka, ayaa sheegay in wasaaradiisu ay qorshaynayso in ay sidaas samayso. Axmed ayaa sheegay in dhawaan uu u gudbiyay Wasaarada Maaliyada qorshe lagu kordhinayo canshuurta alaabta dibada laga keeno oo la mid ah alaabta gudaha lagu sameeyo si loo kaalmeeyo loona ilaamiyo warshadaynta maxaliga ah.
Madaxwayne gobaleedka Soomaliland Axmed Maxamed Siilaanyo ayaa xadhiga ka jaray xaflada, isaga oo balan qaaday in maamulkiisu ay ka go’an tahay in ay maalgashiga gobalka kor u qaado ayna kordhiso shaqo abuurka iyada oo u sii maraysa siyaasado iyo kaalmo dhinaca tiknolojiyada ah.
Waxaa qoray Barkhad Daahir oo Hargaysa jooga
Isha: Sabahi
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
