(Salaamanews)-Ciidamada maamula magaalada Kismaayo ee xarunta gobolka Jubada hoose, ayaa sheegay inay baaritaan ay sameeyeen kadib soo heleen walxaha qarxa oo ay ku soo qabteen raggii watay, waxaana ay sheegeen inay ka hor tagaan weerar ismiidaamin ah oo lala damacsanaa saraakiisha hogaamisa maamulka Kismaayo.
Ciidamada uu hogaamiyo horjoogaha ururka Raaskambooni, Axmed Maxamed Islaam, ayaa gacanta ku soo dhigay 12-ruux oo dhallinyaro ah iyo hubkii ay wateen kadib howlgallo habeenkii xalay ahaa ay ciidamadu ka sameeyeen xaafadaha Kismaayo.
Baaritaanka oo xoogiisu uu ka dhacay xaafadaha Farjano iyo Dalcada ayaa waxaa siyaabooyin kala duwan loogu soo qabtay dhallinyaro, kuwaasoo qaarkood la sii daayay markii ay ciidanku ku waayeen wax dambi ah.
Dhallinyara oo xalay ku hoyday saldhiga baliiska magaalada Kismaayo, ayaa la sheegay in dhawaan lagu wareejin doono maxkamadda ciidamada magaalada, si ay xukunno kala duwan ugu rido ragaasi.
Taliyaha ammaanka magaalada Kismaayo Col. Axmed Diini oo Saxaafada kula hadlay magaalada Kismaayo, ayaa wuxuu shaaca ka qaaday in raggaan ay qaarkood ku cadahay inay ka tirsan yihii xoogaga Al-Shabaab yihiin.
“Waxaan ku soo qab qabanay iyagoo sita walxaha qarxa, waxayna sameynayeen qorshe ay ku fulin rabeen weerar ismiidaamin ahaa, oo ay la damacsanaayeen taliska Kismaayo, marka waaba iska cadahay sababta ay noo soo weerari rabee” ayuu yiri Mr. Diini.
Col. Axmed Diini ayaa wuxuu tilmaamay in baaritaanada ay ku wadaan raggaasi, ay ku ogaanayaan haddii ay jiraan rag kale oo Al-Shabaab ka tirsan, oo ay ogsoon yihiin inay ku sugan yihiin magaalada Kismaayo.
Mr. Diini ayaa wuxuu ugu dambeyn sheegay in hawl galada ay ka wadaan Magaalada Kismaayo ay sii socon doonaan, islamarkaana ay geli doonaan goob walba oo ay ku tuhmayaan kooxda Al Shabaab.
Salaamanews
Kismaayo, Jubadda-hoose
Info@salaamanews.com
![Mowliidka [bidix]](http://salaamanews.com/somali/wp-content/uploads/2013/01/Mowliidka-bidix.jpg)
